Qelandina goştê berxê û kartolê

Qelandina goştê berxê û kartolê bi taybetî li Serhedê ji bo mêvanan tê çêkirin. Li Çewlîgê bêhtir deng vedaye, wekîn xwarineke Bîngolê jî tê zanîn. Qelandinên wiha li başûrê Kurdistanê û Botanê bi tevî hin biharbêhnên (biharat) teze tên bitehmkirin. Her herêm a xwe çêjdartir dibîne.

Berkeliya "kartolkebaba Bîngolê"

• 10 kartol (qompîr, patet, kepole)
• 1 KX (kevçiyê xwarinê) rûnê tîr (margarîn an nivîşkî)
• 150 gr tîkegoşta berxê
• 2 îsotên dirêj ên heşîn (tûj)
• 1 KX mergeya fringiyê
• Qevdek îsota tûj (îsota sor, îsota pûlpelî)
• 1 SA (stekana-qedeha avê) savara hûrik (girara hûrik)
• 1 serî pîvaz
• 2 fringî (pamîdor, bacanê sor, tomatos)
• Li ser daxwazê qevdek biharbêhna merzekewê (rihan)

Çêkirin

Tîkegoştê bidin ser agirê nizm, heya ava xwe kişand bihêlin. Rûn berdin navê, goşt bi tevî pîvaza hurkirî biqelînin. Fringî û îsota hûrkirî tevlî bikin, heya fringiyan ava xwe kişand biqelînin. Xwê, îsota tûj, merge û kartolê berdin navê, çend kelan pê bînin.

Savarê tevlî bikin, heya savar bû, bikelînin. Beriya servîskirinê hinekê bidin sekinandin.