Open main menu

Mem (Mela Mehemedê Mela Evdilxefûrê Hezanî)

Şaîr Mem (Mela Mehemedê Mela Evdilxefûrê Hezanî), 1939 de nahîyeya Lîce Hezan de ameyo dinya. Hema ke 5-6 serre bîyo verê destê babiyê û Seydayê xasî de dest bi wendişê Quranî kerdo. 1949 de reya verêne Hezan de wendegeh ağabeyyo, ey zî no wendegeh de 5 serrî bi tirkî wend. Dima ra wendişê xo yê dînî medreseyanê cîya-cîyayan de dewam kerd. Serra 1969 de bi qadroya resmî dest bi îmamtî kerd.

Serra 1958 de wexto ke feqîtî kerdêne dest bi nuştişê şîîran kerdo. Şîîrê ey ê verênî Barzanî ser o bî. 1980 de bi kurmanckî Leyla û Mecnûn temam kerde. Serrêk dima ra zî bi kirdkî (zazakî) Eqîdeyê Îmanî temam kerdo. Nê her di metnî zî menzûm ê. Eqîdeya Îmanî, hetê Malmîsanij û Roşan Lezgînî ra transkirîbeyê alfabeya latînî bîyo û Vate, Kovara kulturî, Hûmare 17, Wisar 2002, r. 28 ra hetanî 41 weşanîyayo.

Hewna zaf şîîrê Memî yê ke bi kirdkî nusîyayê zî estê.


Yew şîîra ey wina ya:


Ez gul a, gula sûr a

Rengan de bêqusûr a

Amed a, birînkûr a

Ez gula qefesdurr a


Ez gul a, gulzerdek a

Boyweş a, qorçîçek a

Ne kilm a, ne dergek a

Gul dest a, xortkeynek a


Ez gul a, rengsipî ya

Nazdar a, gulbade ya

Reqqas a, saz nîna ya

Awirê xort-keyna ya


Ez gula keksereng a

Ez şox a, hem ez şeng a

Bilbilan rê awaz-veng a

Serê min de ala reng a


Ez Mem a, helbestvan a

War-weşê Mem-Zînan a

Egît û Mazlûman a

Zîlan û Bêrîvanan a


Ez gul a, gul mebevş a

Zerrweş a, çar û şeş a

Çîçek a, bi boy weş a

Zerrî ra ez nêweş a



ÇimeBiguherîne

Yekta H. Okçu & Roşan Lezgîn, Vate, Kovara Kulturî, Hûmare 16, Zimistan 2002, r. 33-53